一向奉行精兵制嘅巴塞，今夏只買入阿歷斯山齊士同法比加斯，同時再由青年軍提升堤亞高艾簡達拿，當中由阿仙奴回巢嘅法比仔，更可以話係呢支新夢之隊嘅最後拼圖。由法比仔、碧基同美斯重組嘅拉瑪西亞「黃金87主軸」，新季勢帶領巴塞實現4連霸！

4大全能中場個個掂

苦等8年，法比仔終於「回家」。03年以16歲之齡離開巴塞嘅法比仔，其實喺97年同碧基齊齊加入拉瑪西亞，同95年入營嘅「師兄」美斯亦老友鬼鬼。3個同樣係87年出生嘅天才，當年齊齊撐起青年軍3線，依家故劍重逢，默契毫無疑問。事實上，前鋒柏度洛迪古斯都係「87仔」，佢雖然喺04年先加入拉瑪西亞，不過佢同碧基及法比仔係西班牙國家隊成員，一樣Friend底。

查實巴塞中場一直以全能見稱，沙維、恩尼斯達、堤亞高艾簡達拿都係攻守兼備、腳法上乘之輩，依家有埋同類型嘅法比加斯，4大中場即使邊個打柴都冇影響實力，一樣咁堅！

A山處子戰有料到

另一位新兵「A山」阿歷斯山齊士係烏甸主力，處子戰鬥皇馬表現亦不俗，嚟緊應該大把世界。講真，哥迪奧拿已經有3年領軍經驗，調配出色，面對莫連奴嘅心理戰亦不落下風，難怪足智彩會將巴塞列為1.52倍奪標大熱，大幅拋離2.35倍嘅皇馬啦！

巴塞in & out

▼ In

阿歷斯山齊士 烏甸尼斯2,600萬歐元

法比加斯 阿仙奴4,000萬歐元

▼ Out

保贊 羅馬1,200萬歐元

謝法倫 士砵亭375萬歐元

米列圖 獨立隊自由身更多赛事信息